Гьелъул пикруялда рекъон, гьелъ цIунулев ГIалиев МухIамадие къварилъи гьабулеб буго МахIачхъалаялъул цIех-рехалъул изоляторалда.
Гьелъул хIалтIухъабаз жидерго ихтияраздаса цIикIкIун пайдаги босун ГIалиевасе гIакъуба кьолеб бугин, гьединго цIех-рех битIун гьабиялъе квалквал гьабулеб, унго-унгоял такъсирчагIи ралагьиялъе нухал къалел ругин хъвалеб буго гIарзаялда.
Гьединлъидал изоляторалъул хIалтIухъаби тамихIалде цIазе квербакъейин ахIи балеб буго адвокаталъ «Мемориалалде».
ГIалиев МухIамад туснахъ гьавун вуго херай гIаданалъул пенсия бикъизе гьабураб тIадекIанцIиялъул гIахьалчи хIисабалда исана февралалда жанив тIамурав чи.
ХIакъикъаталдайин абуни, жинца гьел чагIи жиндирго машинаялда гьелъул рукъалда аскIоре гурони щвезаричIин, гьез гьабизехъин букIараб жоги жинда лъалароанин абулеб буго туснахъ гьавурас.
Гьеб хIужа ккун буго ГIахъуша росулъ. ТIадекIанцIи гьабулеб мехалда, МухIамадова Хадижат абулей гIаданалъул рокъов вукIун вуго 14 сон барав васги. Гьедин гьевги рикIкIун вуго къварилъи ккаравлъун. Балугълъуде бахараб лъимер гъорлъ бугеб кIвар бугеб хIужайин абун низам цIунулез гьеб МахIачхъалаялде битIун буго цIех-рех гьабизе. Амма жакъа къоялде щвезегIанги адвокаталад лъалеб гьечIо киб гьеб ишалъул цIех-рех гьабулеб бугебали.
Сапият МухIамадова: «Киб бугеб такъсиралъул цIех-рех гьабиялъул иш? ЦIех-рехалъул комитеталъ абулеб буго жидехъ гьечIин гьебилан. Прокуратураялъги абулеб буго жиехъ гьечIилан. Кибха букIине кколеб? Лаваша бугин абулеб буго цояз. Амма гьенибги батичIо, гьедилъидал дида лъаларо киб гьеб балагьизе кколебали».
23 июналда изоляторалде щварал инсанасул ихтиярал цIунуел ва жамгIиял хIаракатчагIазда бихьун буго ГIалиев МухIамадие туснахъалъуб гIакъуба кьолеб букIинги.
Гьединал хIужаби щайин нахъчIваларелин Дагъистаналъул туснахъазул нухмалъулев Муслим Даххаевасухъе хъвараб гIарза буго Сапият МухIамадовалъ хъвараб.
Жидер туснахъалда кинабго лъикI бугин, 2011 соналъул августалдаса нахъе туснахъчагIаздехун ГIалиев МухIамадил кинабгIаги тIадкеIалъайги гьечIин хъван буго жавабалда. Гьевин абуни туснахъ гьавуна исана февраль моцIалда.
ПалхIасил, ГIалиев МухIамдие туснахъалъуб гIакъуба кьолеб бугилан жинца ахIи-хIур бахъинабулеб букIиналъ бокьун гьечIин гьезие жий гьесул адвокатлъун йикIинеян рикIкIунеб буго Сапият МухIамадовалъ.
Сапият МухIамадова: «Дида бихьана жанахIалъусан вачун вачIунаго, Шамиль абун цIар бугев цIех-рехчияс МухIамадида мугъзалъ зар лъолеб. Дуца щайин абулеб дица мун адвокаталдаса инкар гьабизабизе тIамулев вугилан. Жинца босун бачIараб тIамачалда дуцаго гурищдила хъвараб гьединан.
Цинги туснахъ гьавурас «у» йилан, бетIер гьанкIана, жинца инкар гьбаулеб бугила адвокаталдаса. Гьеб мехалда дица абуна гьабсагIаталдагицин бихьулеб бугин дуца гьесде тIадецуй гьабулеб букIин, дида цебе мугъзалъ кьабана гурищин дуца гьесда. ПалхIасил, дица ахIи-хIур бахъинабуна гьениб. Гьеб мехалда вачун ана гьев.
Цо заманалда бачIана кагъат, дидаса инкар гьабулеб бугин хъвараб. Гьединго бачIана анлъго батIияб гIарзаги.
Туснахъ гьавурас хъвалеб бугоан жиндие гIакъуба кьей чIезабичIони, живго жинцаго гъанкъизе вугин живилан. 10 июналдаги вуханин жив туснахъчагIаз, гьез тIалаб гьабулеб бугин жинца адвокаталдаса инкар гьабизе».
Гьеб анлъабго гIарза ГIалиев МухIамадица кIиабилев адвокатасухъе кьун бачIун буго. ТуснахъчагIазда лъалеб букIун гьечIин гьесул жеги цойги адвокатги вугеблъийин бицана Сапият МухIамадовалъ.
ГIакъуба кьей гуребги, туснахъчагIаз ГIалиев МухIамад адвокатгун цадахъги толев гьечIин, хъата-масан цIех-рехчиги кIанцIулин гьоркьовейин абулеб буго гьелъ.
Гьеб киналдаго тIасан цIех-рех гьабизе адвокаталъе рагIи кьун буго туснахъазул нухмалъулев Муслим Даххаевас.
