Мисралда гьатIан къоялда байбихьизе кколеб букlараб хъулухъалдаса рехарав президент МухIамад Мурсида тIад диванаханаялъул процесс февралалъул ахиралде нахъбахъун буго. Гьесда гIунтIизабулеб буго жасуслъи гьабиялъул гIайиб. Жеги 35 чиясда гIунтIизабулеб буго Мисралда терактал гьаризелъун къватIисел улкабигун къотIи гьабиялъул гIайибал. ЦIех-рехалъул версиялда рекъон, Мурси Палестианалъул «Гьамас», Ливаналъул «Гьезболлагь» ва Ираналъул «исламияб инкъилаб цIуниялъул» Корпусгун рекъон хIалтIулев вукIун вуго. Гьесул гIайиб тIад чIезабуни, гьев чIвазе хIукму къотIизеги рес буго. Мурсица ва гьесул рахъ кколез гьесда гIунтIизарулел ругелщинал гIайибал политикияб кьучI бугеллъун рикIкIуна. Гьев хъулухъалдаса рехун вукIана 2013 соналда рагъулаз ва гьелдаса нахъе гьев жанив ккун вуго.