«6 маялъул Комитеталъ» гьабун буго Сочиялда тIоритIизе ругел Олимпиадаялъул хIаязул гIахьалчагIазде хитIаб. Гьелда гьез спортсменазда лъазабулеб буго гражданиял активистаде данде гьарулел репрессиязул. Хас гьабун кIвар буссинабулеб буго «6 маялъул ишалде». Гьелда рекъон, такъсир гьабунин абун жавабчилъиялде цIан вуго Москваялда Болотное майданалда 2012 соналъул 6 маялда демонстрациялде вахъун вукIарав 30-гIан чи. Гьеб хитIабалъул авторазда ракIалде кколеб буго къватIисел улкабаздаса гIадамал, россиялъул гIадамалго гIадин мекъи кколел ратилин гьеб ишалъул киналго гIахьалчагIазе «амнистия» гьабун букIиналда хурхун. Россиялъул Конституциялъе 20 сон тIубаялда бан гьабураб амнистиялде гъоркье гьеб ишалъул 6 чи гурони ккун гьечIо. ХитIабалъул автораз жеги кIвар буссинабулеб буго политикияб акция тIобитIиялда бан жанир тIамурал гIадамал туснахъалъур цIогьазда ва чIвадарухъабазда аскIор тIамун рукIиналдеги.