Сербиялда ва Косовоялда гьоркьор гьал къоязда Брюсселалда унел рукIарал кIалъа-ралъаял рагIалде рахъана кинабгIаги хIасилги ккечIого. Европаялъул хъулухъчагIазул баяназда рекъон, гьез гьоркьоб лъун букIун буго сербаз гIумру гьабулеб бугеб Косовоялъул шималияб рахъалъул статусалда хурхараб суал. Белградалъул ва Приштинаялъул гьоркьорлъаби лъикIлъиялда бараб буго Европаялъул Цолъиялде Сербия лъугьиналъул суал. 2008 соналда батIа тIун чIараб Косово гьединаб букIин къабул гьабулеб гьечIо жеги Белградалъ.