Hermitage Capital фондалъул юрист Сергея Магнитскиясде ва гьеб фондалъул бетIер Уильям Браудериде данде Москваялда Тверской абулеб диваналда итни къоялда байбихьун рукIарал гIенеккиял чанго минуталдасан къотIизе тана ва 22 марталде нахърахъана. Гьедин лъазабулеб буго Эркенлъи Радиоялъул мухбираз. Гьединго лъазабулеб буго Магнитскийгун Браудериде данде магъало кьечIолъиялда бан рагьараб такъсир гьабиялъул ишалъул 60 тIехь бугин ва гьел цIунулезда гьезул щугоялъулгун гурони лъай-хъвай гьабизе бажаричIин. Гьеб ишалъул хал гьабизе буго гIайиб гIунтIизарулелги гьечIого, щайгурелъул Магнитский Москваялъул цIех-рехалъул изоляторалда хун вукIун ва Браудер Россиялда гьечIого. Диваналъ гьезие тIамун руго пачалихъиял адвокатал. Браудерида гьединго гIунтIизабулеб буго къануналде данде кколареб куцалда «Газпромалъул» акциял росулел рукIанин абун.