Дагъистаналъул нухмалъулесул ихтиярал тIуразарулевлъун ГIабдулатIипов Рамазан вихьизавиялъул церемония арбагI къоялда тIобитIулеб букIана бакIалъул журналисталги ахIичIого гIицIго федералиял журналисталги ахIун.
Рамазан ГIабдулатIипов рещтIана МахIачхъалаялъул аэропорталда къад сагIат лъабго тIубарабго. Гьев дандчIвазе рачIарал гIадамазул халатаб читIир букIана аэропорталда сверухъ. ЦIияв республикаялъул нухмалъулесулгун халкъалъул лъай-хъвай гьабизе вачIана Шималияб Кавказалъул федералияб округалъул нухмалъулев Александр Хлопонин ва гьоркь вукIарав бетIер МухIамадсалам МухIамадов. БачIинахъего тIадегIанал гьалбазул халатаб читIир къокъана республикаялъул хъахIаб рукъалде. Гьенир ракIарун рукIана гIемерал гIадамал ва шагьаралъул аслияб майдан сверун рахъун чIун рукIана къуваталъул идарабазул хIалтIухъаби.